Basa Jawa tur ora penting: Baladewa kelangan gapit

Wes pirang - pirang dina iki aku kepingin nulis artikel sing rada mutu  nanging nganggo basa Jawa. Jebul kok ya angel temen. Ana sakjerone artikel sing durung dadi kuwi aku uga kepingin gawe sanepa yen priyagung kelangan prabawa ki kaya wayang satriya kang ilang gapite. Nanging ndilalah aku blas ora kelingan paribasan basa jawa sing ngemu unen unen kuwi.. "kaya.... ilang gapite" Kaya sapa yaa? Werkudara? Gatutkaca? Dursasana (Dursasana ki satriya dudu yaa?)

Saking judheg anggonku mikir, satriya ngendi kang kelangan gapit kuwi, aku dadi ra sida ngrampungake tulisanku. Lha pas ndelok Iwan Fals neng TV sing  nyanyine apik banget, nanging bareng kudu pidato mung plegak pleguk ora karuwan, aku njuk kelingan satriya iku maneh.."Lha.. iki ya padha wae.. kaya......... ilang gapite," mengkono pikirku. Rasa penasaran (penasaran ki basa Jawane apa?) ku metu maneh. Sapa ya? Kaya ... ilang gapite, kaya sapa?

Tekan kantor, kanca - kanca sak kantor tak takoni yo ora ana sing ngerti. "Sik tak takokke Pak Anu neng gedung Pusat bagian X.. kae jagone babagan wayang.." mengkono ngendikane Bu M. Wah, urusan kelangan gapit wes nyebrang kantor Aku uga sms kanca - kancaku sing kira - kira ngerti urusan iki. Lha kok saben sing daktakoni melu penasaran. Ho'oh ya? Sapa sing Ilang gapite? Malah ono sing wangsulan, sik tak nyuwun priksa Prof Anu, Dokter Anu, utawa Doktor sapa maneh.... we lha gawat..  para priyagung Gadjah Mada arep melu urun rembug urusan kelangan gapit..

Esuk uthuk uthuk mau, bar subuh wes ana pirang - pirang sms mlebu Hapeku:
"Jebul Baladewa sing kelangan gapit",
"Kayaknya Prabu Baladewa Bu.. kalo gak salah"
"Bu, kata suami saya, Prabu Baladewa ilang gapite"
lsp (lan sapanunggalane)

ana maneh sing unine:
"Oh Raden Gatotkaca ya boleh ya? Ya, Prof matur nuwun.." Iki mesthi forward-an seka priyagung Gadjah Mada sing uga piawai sual per-gapitan..

Sing gawat maneh:
"Lha arep nggapiti sapa ta?"
"Panjenengan nemu gapit wonten pundi" wee.. lha saya adoh ki urusan-e..

Aku banjur eling Wiwit Ibune Vari.. hehe.. sapa ngerti dheweke uga duwe ngelmu pergapitan eh pewayangan kang dhuwur, dadi ngerti, sapa sing sakjatine kelangan gapit. Wes pokok-e sapa sing kira -kira ngerti tak takoni.

Bareng tak coba nggoleki neng google, jebul urusan iki uga wis diserat ana wikipedia. Pancen paribasan iku unine:

Baladewa ilang gapite, iku wong kang ilang kaluhurane. Baladewa iku wayang kang gagah pideksa, nanging wayang yen ilang gapite ora isa dienggo dening dhalang. Gapit iku kayu utawa lulang penyu sing kanggo njepit wayang supaya bisa ditancepke ing debog lan bisa jejeg.

Wah, ngertio isa digoleki seka google, aku rak ora sah marai geger wong sak kampung kon nggoleki sapa sing kelangan gapit Kagem para kanca, sanak kadang inggih para pini sepuh lan priyagung ingkang sampun kula repoti babagan pergapitan punika, kula nyuwun agenging pangaksoma..

Jebul gapite Prabu Baladewa uga isa digoleki ana internet..

 

  

Gambar Prabu Baladewa, kajupuk seka kene